Microsoft Office 2007/2010 -ல் Office 2003 -இன் மெனு வடிவை அமைக்க

நீங்கள் மைக்ரோசாப்ட் ஆஃபீஸ்  2007 அல்லது 2010 உபயோகித்துக் கொண்டு இருக்கிறீர்களா? ஆபீஸ் 2003 -ல் பல வருடங்களாக பனி புரிந்துவிட்டு, தற்பொழுது இந்த   ரிப்பன் மெனுவில் நீங்கள் தேடும் கட்டளை எங்கு உள்ளது என்ற குழப்பம் தீர நெடு நேரமாகலாம். சில சமயங்களில் உங்கள் பாஸ் குறிப்பிட்ட சமயத்திற்குள்ளாக முடித்து தரச்சொல்லி  கொடுத்த வேலையை இந்த ரிப்பன் மெனு குழப்பத்தின் காரணமாக டென்ஷனாகி முடியை பிய்த்துக் கொள்ள வேண்டியதுதான். ஒரு வேளை 2007 /2010-ல்  2003 -இன் மெனு வடிவை அமைக்க வழி இருந்தால் எவ்வளவு வசதியாக இருக்கும் என்று தோன்றுகிறதா?

இதோ உங்களுக்காக.., UBitMenu Add-in.  இது ஒரு புதிய ரிப்பனில் 2003 மெனுவை உங்கள் 2007  அல்லது 2010 பதிப்பில் கொண்டு வரும். (தரவிறக்கச் சுட்டி இறுதியில் தரப்பட்டுள்ளது)

இந்த Add-in உங்கள் Word, Excel, மற்றும்  PowerPoint 2007 மற்றும் 2010 -ல் 2003 பதிப்பின் கிளாசிக் மெனுவை நிறுவும். அதுமட்டுமல்லாமல் 2007 /2010 -ல் உள்ள அனைத்து புதிய வசதிகளும் அப்படியே இருப்பது இதன் சிறப்பு. கீழே உள்ள படத்தைப் பாருங்கள். இதில் 2003 -இன் மெனுவும் நிறுவப்பட்டுள்ளது, அதோடு 2007- ல் உள்ள PDF ஆக சேமிக்கும் வசதியும் தரப்பட்டுள்ளது. 

Power Point -ல் எளிதாக வேலை செய்யுங்கள்.

இந்த நீட்சி சொந்த உபயோகத்திற்கு மட்டும் இலவசமாக வழங்கப் படுகிறது.

Download UBitMenu

.

கூகிள் அனலிடிக்ஸ் Code ஐ எங்கே போய் தேடுவது

நமது வலைப்பூவிற்கு குறிப்பிட்ட கால இடைவெளியில் எத்தனைபேர் வருகை தந்துள்ளார்கள், உலகின் எந்தெந்த பகுதிகளிலிருந்து வருகை தந்துள்ளார்கள், நமது தளத்தில் எந்த பக்கத்தை எவ்வளவு நேரம் பார்வையிட்டிருக்கிறார்கள், எந்த தேடுபொறியின் வழியாக வந்திருக்கிறார்கள், அல்லது எந்த வலைப்பக்கத்திலிருந்து வந்திருக்கிறார்கள், எந்த உலாவியில் நமது வலைப்பூவை திறந்திருக்கிறார்கள், எந்தெந்த குறிச்சொற்களை உபயோகித்து வந்திருக்கிறார்கள் போன்ற பல வகையான பயனுள்ள விவரங்களை ஒரு வலைப்பூவின், வலைத்தளத்தின் உரிமையாளருக்கு வழங்குவது இந்த கூகிள் அனலிடிக்ஸ் வசதி என்பது பெரும்பாலும் அனைவரும் அறிந்த ஒன்றாகும். 

இந்த வசதியை பயன்படுத்தி நாம் நமது தளத்தை மேலும் பலரை சென்றடைய என்னென்ன செய்யவேண்டும் என்பதை முடிவு செய்ய இயலும். என்பது இங்கு நான் சொல்லி தெரியவேண்டியதில்லை. 

சரி இப்பொழுது தலைப்பிற்கு வருவோம். இந்த வசதியை பயன்படுத்த நாம் கூகிள் அனலிடிக்ஸ் -இல் ஒரு கணக்கை உருவாக்கும் பொழுது நமது வலைப்பூவில் இணைப்பதற்காக நமக்கு தரப்படும் HTML code ஐ நாம் காப்பி செய்து இணைத்திருப்போம். பிறகு சில நாட்களுக்குப் பிறகு நமது வலைப்பூவின் template ஐ மாற்றி விடலாமே என்ற எண்ணத்தில் template ஐ மாறிவிட்ட பிறகு, மறுபடியும் இந்த கூகிள் அனலிடிக்ஸ் code ஐ  இணைக்க வேண்டுமே என்ற யோசனை வரும்பொழுதுதான் நமக்கு நினைவிற்கு வரும்,  நாம் அந்த code ஐ வேறு எங்கும் சேமித்து வைக்கவில்லை என்பது. 

 சரி, கூகிள் அனலிடிக்ஸ் தளத்திற்கு சென்று எடுத்துக் கொள்ளலாம் என்று முடிவு செய்தபிறகு, தளத்தில் எளிதாக இந்த code ஐ தேடி எடுக்கும்படியாக அமைக்கப்படவில்லை. இதன் காரணமாகவே பலரும் தாங்கள் உருவாக்கிய கூகிள் அனலிடிக்ஸ் கணக்கை மறுபடியும் பயன்படுத்துவதை நிறுத்தி விடுகிறார்கள். 

இதை எளிய வழிமுறையில் எப்படி கண்டறிவது என்பதை பார்க்கலாம். முதலில் உங்கள் கூகிள் அனலிடிக்ஸ் கணக்கில் நுழைந்து கொள்ளுங்கள். உங்கள் வலைப்பக்க முகவரிக்கு நேராக உள்ள edit லிங்கை க்ளிக் செய்யுங்கள்.  

அடுத்து திறக்கும் திரையில் Main Website Profile Information டேபிற்கு வலது மேல் மூலையிலுள்ள Check Status லிங்கை க்ளிக் செய்யுங்கள். 

அவ்வளவுதான்... 

அடுத்த திரையில் நீங்கள் தேடிக்கொண்டிருந்த Google Analytics Tracking Code. காப்பி  செய்து  உங்கள் வலைப்பூவில் இணைத்து பயன்பெறுங்கள். 

'கூகிள் அனலிடிக்ஸ்  வசதி எனக்கு எதற்கு?'  என யோசிப்பவர்களும் ஒட்டு போடலாம். 

.     

விண்டோஸ் விஸ்டா/ஏழில் விரைவாக பணிபுரிய

நாம் வழக்கமாக கணினியில் பணிபுரியும் பொழுது, ஸ்டார்ட் மெனுவிற்கு சென்று தேவையான ஐகான்களை க்ளிக் செய்வதன் மூலமாகவோ அல்லது ஷார்ட் கட் ஐகான்களை க்ளிக் செய்வதன் மூலமாகவோ நாம் விரும்பும் பயன்பாடுகளை இயக்கி வருகிறோம். 

இன்னும் கொஞ்சம் எளிதாக, நாம் அடிக்கடி உபயோகப்படுத்தும் பயன்பாடுகளை நமது விரல்களின் கட்டுப்பாட்டில்,  அதாவது டெஸ்க் டாப் திரையில் வலது க்ளிக் செய்து வரும் Context மெனுவில் பொதிந்து கொண்டு தேவையான நேரத்தில் விரைவாக அந்த பயன்பாடுகளை இயக்க விண்டோஸ் விஸ்டா மற்றும் ஏழு இயங்குதளத்திற்கான ஒரு இலவச மென் பொருள் கருவி Context Menu Editor.    

நாம் சாதாரணமாக மௌசின் வலது பொத்தானை க்ளிக் செய்யும் பொழுது வரும் context menu , மற்றும் Shift கீயை அழுத்தியபடி வலது க்ளிக் செய்யும் பொழுது வரும் Extended Context menu ஆகிய  இரண்டிலும் நமக்கு தேவையான ப்ரோகிராம்களின் ஷார்ட் கட்டை  உருவாக்கி விரைவாக பணியாற்ற (Registry Editor க்கு சென்று நாம் தேவையில்லாத குழப்பங்களுக்கு ஆளாகாமல்) இந்த கருவியை உபயோகித்து விரைவாகவும் எளிதாகவும் செய்து விட முடியும். 

இதில் நமது அபிமான வலைப்பக்கங்களுக்கு லிங்கையும் உருவாக்க முடியும் என்பது இதனுடைய சிறப்பம்சம்.இந்த கருவியை இயக்கி Add டேபிற்கு சென்று சரியான அப்ளிகேஷன் path மற்றும் icon path ஐ கொடுத்து விட்டால் போதுமானது. (பெரும்பாலும் EXE கோப்பிலிருந்து அதற்கான ஐகானை அதுவாகவே எடுத்துக் கொள்ளும்) Extended Context மெனு தேவையெனில் அதற்கு நேராக உள்ள செக் பாக்சை தேர்வு செய்து கொள்ளுங்கள். 

இப்படி உருவாக்கிய context மெனு ஷார்ட்கட்களை நீக்க வேண்டுமெனில், Remove டேபிற்கு சென்று குறிப்பிட்ட பயன்பாட்டில் வலது க்ளிக் செய்து delete தேய்வதன் மூலமாக  எளிதாக நீக்கிக்கொள்ளலாம். 

     

  Context Menu Editor தரவிறக்க 

.

விண்டோஸ் 32 பிட்டா / 64 பிட்டா?

விண்டோஸ் இயங்குதளத்தில் 32 Bit, 64 Bit என இரண்டு வகைப்பட்ட இயங்குதளங்கள் உள்ளது என்பதை நாம் அறிவோம். நாம் விண்டோஸ் எக்ஸ்பி பயன்படுத்தி வந்த காலங்களில் நமக்கு இந்த 32 Bit / 64 Bit -ல் எதை உபயோகிப்பது என்பதைப் பற்றிய யோசனை தோன்றவில்லை. ஆனால் தற்பொழுது நாம் பதிதாக வாங்கும் மடி கணினிகள் பெரும்பாலும் 64 பிட் விண்டோஸ் 7 இயங்குதளம் நிறுவப்பட்ட நிலையில் தான் விற்பனைக்கு வருகின்றன. 

முதலில் உங்கள் விண்டோஸ் 7 இயங்குதளம் 32 பிட்டா அல்லது 64 பிட்டா என்பதை எப்படி அறியுஅ முடியும் என்பதை (பலருக்கு தெரிந்தாலும், புதியவர்களுக்காக) பார்க்கலாம்.   Start menu வில் Computer -ல் வலது க்ளிக் செய்து Properties செல்லுங்கள். 

இப்பொழுது திறக்கும் System information திரையில் System Type -ல் உங்களது இயங்குதளம் 32/64 பிட்டா என்பதை அறிய முடியும். 

சரி! இவை இரண்டிற்கும் என்ன வித்தியாசம்? மேலே உள்ள படத்தை கவனியுங்கள், அதில் Installed Memory (RAM)   8 GB. விண்டோஸ் 32 பிட் இயங்குதளங்கள் 4 GB க்கு மேல் நினைவகத்தை ஏற்றுக் கொள்ளாது. 

இது கணினியின் நினைவகம் மட்டுமல்ல, நீங்கள் உபயோகிக்கும் வீடியோ கார்டும்தான். 4 GB க்கு மேலாக RAM அல்லது வீடியோ கார்டு பயன் படுத்த வேண்டுமானால் நீங்கள் 64 பிட் இயங்குதளத்திற்குத்தான் மாற வேண்டும். 

மேலும் 32 பிட் மென்பொருட்கள் பெரும்பாலானவை 64 பிட் இயங்குதளத்தில் இயங்கும் ஒரு சில மென்பொருட்கள் உதாரணமாக AutoCAD, 3 D Studio போன்றவைகள் நிச்சயமாக 64 பிட் பதிப்பாகத்தான் இருக்க வேண்டும். 

மற்றொரு முக்கிய செய்தி 64 பிட் என்றவுடன் 32 பிட்டுக்கு அப்படியே இரட்டை வேகத்தில் இருக்கும் என எதிர்பார்க்கக் கூடாது. 

எனது இந்த வலைப்பூவிற்கு தங்களது வலைப்பக்கத்தில் லிங்க் கொடுத்தும், மின்னஞ்சலில் நண்பர்களுக்கு தெரிவித்து வரும் அனைத்து நண்பர்களுக்கும்  எனது கோடானுகோடி நன்றிகள். 

. 

       

விண்டோஸ் Dreamscene - வீடியோ வால்பேப்பர்

விண்டோஸ் இயங்குதளத்தில் டெஸ்க்டாப் வால் பேப்பராக புகைப்படங்களை வைத்து போரடித்துப் போனவர்களுக்கு, புகைப்படங்களை விட வால் பேப்பர் ஆக உங்களிடமுள்ள  அபிமான வீடியோவை  மாற்ற விண்டோஸ் விஸ்டா அல்டிமேட் இயங்குதளத்திற்கு  Dreamscene என்ற வசதி தரப்பட்டுள்ளது. இதே வசதியை VLC மீடியா பிளேயரைக் கொண்டு எப்படி உருவாக்குவது என்பதை ஏற்கனவே ஒரு இடுகையில் பார்த்தோம். விண்டோஸ் 7 இயங்குதளத்தில் இந்த வசதி தரப்படவில்லை.  எனினும் இந்த வசதியை விண்டோஸ் 7 -ல் எப்படி உருவாக்குவது என்பதை இறுதியில் பார்க்கலாம். 

முதலில் Dreamscene வசதியை விண்டோஸ் விஸ்டாவில் (அல்டிமேட்) எப்படி நிறுவுவது என்று பார்க்கலாம். 

Start மெனுவில் All Programs சென்று Windows update ஐ க்ளிக் செய்யுங்கள். அங்கு View available Extras என்பதை க்ளிக் செய்து, லிஸ்டில் Windows DreamScene இல்லையெனில் Check for updates லிங்கை க்ளிக் செய்யுங்கள். இனி பட்டியலில் வரும் Windows DreamScene க்கு நேராக உள்ள செக் பாக்சை க்ளிக் செய்து Install க்ளிக் செய்யுங்கள். இனி இந்த கருவி தரவிறக்கப் பட்டு உங்கள் கணினியில் பதியப்படும். ஒரு முறை கணினி ரீஸ்டார்ட் ஆகி வந்த பிறகு இந்த வசதி உங்கள் கணினியில் activate செய்யப்படும். இதனூடே ஒரு தரமான வீடியோ கிளிப்பும் உங்களுக்கு வால் பேப்பராக மாற்ற கிடைக்கும்.

மேலும் ஹை குவாலிடி வீடியோக்களைப் பெற, மேலே சொன்ன வழிகளை பின்பற்றி check for updates பட்டியலில் Windows DreamScene Content Pack ஐ தேர்வு செய்து install க்ளிக் செய்தால் போதுமானது. 

சரி. இந்த வசதியை விண்டோஸ் 7 இயங்குதளத்தில் உருவாக்க என்ன வழி இருக்கிறது என்று பார்த்தால், இதற்காக  பிரத்யேகமாக Windows 7 DreamScene Activator எனும் இலவச கருவி அமைந்துள்ளது. (தரவிறக்கச் சுட்டி இறுதியில் தரப்பட்டுள்ளது) 

இதனை தரவிறக்கிய பின்னர் இதன் மீது வலது க்ளிக் செய்து context மெனுவில் Run as administrator ஐ க்ளிக் செய்து பதிந்து கொள்ளுங்கள்.  இங்கு Enable DreamScene என்ற பொத்தானை அழுத்தி activate செய்து கொள்ளுங்கள். 

 Windows Explorer ஒரு முறை ரீ ஸ்டார்ட் ஆகி வந்த பிறகு, தேவையான வீடியோவின் மீது வலது க்ளிக் செய்து, Set as Desktop Background ஐ க்ளிக் செய்தால் போதுமானது. 

 

அவ்வளவுதான்! இனி உங்கள் அபிமான வீடியோக்களை உங்கள் டெஸ்க்டாப் சுவர்தாளாக மாற்றி மகிழுங்கள். வீடியோவை  pause செய்ய டெஸ்க் டாப்பில் வலது க்ளிக் செய்து  Pause DreamScene க்ளிக் செய்யலாம்.

Windows 7 DreamScene Activator தரவிறக்க 

.

வைச்சுட்டாங்கைய்யா ஆப்பு!

வணக்கம்!

நான் கடந்த 17-07-2010 சனிக்கிழமை காலை எனது கணினியை திறக்கும் பொழுது எனக்கு ஓர் பேரதிர்ச்சி காத்திருந்தது. முதலில் Firefox திறந்த பொழுது, Homepage ஆன எனது ப்ளாக் http://suryakannan.blogspot.com -ல் No Posts என காண்பித்தது. 

அடுத்த டேபில் ஜிமெயில் (suryakannan@gmail.com) கணக்கில் நுழைய முயன்றபொழுது The username or password you entered is incorrect. என்று வந்தது. அப்பொழுது சரியாக பதிவர் நண்பர் வேலன் அவர்களின் தொலைபேசி அழைப்பு வந்தது. 'உங்க ப்ளாக் என்னாச்சு?' என அவர் கேட்டிருந்தபொழுது, 'நானும் இப்போதான் பார்த்துக் கொண்டிருக்கிறேன்' என்று பதிலளித்த போதும், எனக்கு அந்து பிரச்சனையின் தீவிரம் பிடிபட்டிருக்கவில்லை. 

எவ்வளவோ முயன்றும் ஜிமெயில் கணக்கில் நுழைய முடியவில்லை. சரி ஏதாவது cookies பிரச்சனியாக இருக்கலாம் என்று History clear செய்து விட்டு, CCleaner ஐயும் ஓடவிட்டு முயற்சித்துப் பார்த்தும் எந்த பயனும் இல்லை. அடுத்து எனது யாஹூ  (suryakannan@yahoo.com) கணக்கில் நுழைய முயன்றபொழுதும், The username or password you entered is incorrect. அதே பிரச்சனை தான். கொஞ்சம் பதட்டம் உருவாக ஆரம்பித்தது. 

பதிவர் நண்பர் ஷிர்டி சாய்தாசன் அவர்களை தொலைபேசியில் தொடர்பு கொண்டேன். விவரத்தை சொன்னேன். அவரும் அவரது கணினியில் முயன்று பார்த்து, ப்ளாக் பிரச்சனையும், கூடுதலாக 'உங்க ஈமெயில் முகவரிக்கு நான் ஈமெயில் செய்தால், email id not exists.. ன்னு   வருது' என்று சொன்னவுடன், பதட்டம் மேலும் அதிகரித்தது. மேலும் அவர் 'பதட்ட படாதிங்க.. நிதானமா உங்க வாசகருக்கு இந்த பிரச்சனை வந்தது போல கருதி இதற்கான தீர்வை கண்டறியுங்கள்..' என்றார்.

கணினி அறையை விட்டு வெளிவந்து ஒரு சிகரெட் பிடித்தேன். ஒரு கோப்பை தேநீரும் கூட.  மறுபடியும் கணினி முன்னால் அமர்ந்து, Rediff mail திறக்க முயன்றபொழுதும், அதற்கடுத்து, Facebook, Orkut, Twitter, Blogger எந்த கணக்கிலும் நுழைய முடியவில்லை. கொஞ்சம் கொஞ்சமாக நிகழ்ந்து முடிந்த விபரீதம் எனது முகத்தை அறைந்தது.

யாருக்காவது மின்னஞ்சல் செய்து ஆறுதல் பெறலாம் என யோசித்தபொழுது, யாருக்கு, எப்படி? அனைத்து முகவரிகளும், எனது ஜிமெயில் Contact list -இல் அல்லவா உள்ளது என்று உணர்ந்ததும், BP எகிறியது. பதிவுலகில் பாலா சார் முகவரி மட்டும் லேசாக நினைவில் இருந்தது போலிருந்தது, பிறகு நான் தோராயமாகத்தான் அவருக்கு நிலையை குறித்து மின்னஞ்சல் செய்தேன்.  அவரிடமிருந்து தொடர்ந்து வந்த பதில்களில் கொஞ்சம் பதட்டம் குறைந்து,  நிதானமாகியிருந்தேன்.  

ஜிமெயில் recovery வசதிகள் அனைத்துமே முயன்றாகிவிட்டது. ஜிமெயிலில்  Recovery/Alternate Email Id யாக எனது யாஹூ id ஐத்தான் கொடுத்திருந்தேன். யாஹூ கணக்கும் முடக்கப்பட்டு விட்டபிறகு அந்த வழியும் அடைபட்டு போனது. யாஹூ Recovery யும் தோல்விதான்.  

இந்த முடக்கப்பட்ட கணக்குகள் அனைத்திற்கும் உள்ள ஒற்றுமை, அதன் பயனர் பெயர் suryakannan என்பதும், மற்றபடி Twitter போன்றவை ஜிமெயில் கணக்கை உபயோகித்து உருவாக்கியிருந்ததால், அதையும் இழக்கவேண்டியிருந்தது என்பதை உணர முடிந்தது. சரி! இதெல்லாம் போய்விட்டது, அடுத்து வேறென்ன தீர்வு என யோசித்ததில், முதலில் மனதில் தோன்றியது ப்ளாக்? அது போனால் போகட்டும், (மொத்தம் 249 இடுகைகள், 419 followers, 2 ,81 ,000 க்கும் அதிகமான ஹிட்ஸ், குறிப்பாக அலெக்சா ரேங்க் கடந்த மூன்று மாத கணக்கில் 1,12,967 இந்த மாதத்தில் 92237 , அதாவது எனது எதிர்பார்ப்பான  ஒரு லட்சத்தை அடைந்து விட்டேன். )    சரி போனால் போகட்டும், புதியதாக ஒரு ப்ளாக் ஆரம்பித்து விடலாம். ஏற்கனவே எடுத்து வைத்திருந்த பேக் அப்  இடுகைகள் 244 இருந்தது, இவற்றைக் கொண்டு தற்பொழுது http://sooryakannan.blogspot.com என்ற இந்த வலைப்பூவை ஆரம்பித்துளேன். (உங்களது மேலான ஆதரவை நம்பி) 

இந்த சம்பவம் குறித்து பாலா சார் தனது இடுகையில் தெளிவாக கூறியிருந்தார். அவருக்கும், எனது ஆறுதல் அளித்த நண்பர்கள், ஆலோசனை கூறி ஊக்கப் படுத்திய நண்பர்கள் அனைவருக்கும் எனது பணிவான நன்றி! 

நான் இழந்தது குறிப்பாக எனது வியாபர சம்பந்தப்பட்ட contacts , முக்கிய மின்னஞ்சல்கள். மற்ற பதிவுலக நண்பர்களுக்கு நிகழ்ந்தது போல எனக்கு எனது ப்ளாக் மட்டும் போகவில்லை.

நான் எனது மின்னஞ்சல் கணக்கில், பண பரிவர்த்தனை எதுவும் செய்வது கிடையாது. நான் பெரிய வியாபார காந்தமும் கிடையாது, பிறகு எந்த காரணத்தைக் கொண்டு எனது இந்த கணக்குகள் ஹேக் செய்யப்பட்டன. இதை ஹேக் செய்தவர்களின் நோக்கம் என்ன? இதனால் அவர்கள் அடையும் பயன் என்ன? பணமோ, வியாபாரமோ இதற்கு காரணமல்ல. எனது ப்ளாக் இன் பாப்புலாரிட்டியை அழிப்பதுதான் இவர்களது நோக்கமாக இருக்க முடியுமென்று தோன்றுகிறது. இந்த பாப்புலாரிட்டியை வைத்துக் கொண்டு நான் என்ன பெரிதாய் சாதித்து விட முடியும்? பத்து பைசாவிற்கு பிரயோஜனம் கிடையாது.

இழந்தவற்றை மீட்பதற்கான முயற்சிகள் நடந்து கொண்டிருக்கின்றன.. பார்ர்க்கலாம். மேலும் இந்த நிகழ்வு எப்படி நடந்திருக்க முடியும், தீர்வு (கிடைத்தால்!) என்ன என்பதைப் பற்றி மற்றொரு இடுகையில் பார்க்கலாம். 

இந்த எனது புதிய வலைப்பூவிற்கு உங்கள் ஆதரவை அளித்து உதவுமாறு வேண்டி விடைபெறுகிறேன். 

எனது புதிய மின்னஞ்சல் முகவரி makcoonoor@gmail.com இது தொடர்பு கொள்ள உங்களுக்கும், இல்லாதொழிக்க ஹேக்கர்களுக்கும்.  

நன்றி

அன்புடன் 

சூர்யா கண்ணன்          

ஆன்லைனில் PAN Card ரூ. 94/- NRI - ரூ.744/- மட்டுமே

பத்து வருடங்களுக்கு முன்பாக நான் PAN Card பெற முயன்ற பொழுது, (உடனடியாக ஒரு டீலர்ஷிப் எடுப்பதற்காக) Income Tax அலுவலகத்தில், வியாபாரிகளின் கணக்குகளை சரிபார்த்து சமர்ப்பித்து வரும் ஒரு தனியார் கணக்கரிடம், ரூ. 350/- கொடுத்து, பிறகு ஒரு மாதத்திற்கு பிறகு பான் கார்டு பெறப்பெற்றேன்.   

ஆனால், அதில் First name, Last name உல்டாவாகி, பெயரே தலைகீழாக மாறிப்போய், உடனடியாக வேறு யாரும் டீலர்ஷிப் எடுக்க முயல்வதற்குள்ளாக, ஏதாவது செய்ய வேண்டுமே என்று, மறுபடியும் பல கடிதங்கள் மற்றும் ரூ. 500/-  மேலாக செலவழித்து மீண்டும் இரண்டு மாதங்களுக்குப் பின்னர் சரியான பெயரில் பான் கார்டு கிடைக்கப் பெற்றேன். 

ஆனால் தற்பொழுது பான் கார்டு பெறும் வழி மேலும் எளிதாக்கப் பட்டுள்ளது. மேலும் ஆன்லைனிலேயே பெறும் வகையில் UTI நிறுவனம் இந்த வசதியை நமக்கு எளிதாக்கியுள்ளது. 

 

இதற்காக ரூபாய் 94/- NRI களுக்கு ரூ. 744/- மட்டுமே பெறப்படுகிறது. இதற்கான ஆன்லைன் விண்ணப்பத்தில், நாமே நிரப்புவதால் பல பிழைகள் தவிர்க்கப் படுகின்றன. இந்த தளத்தின் மூலமாக மட்டுமின்றி, வேறு எப்படி  Apply செய்த பான் கார்டின் Status ஐ அறியவும் PAN Verification என்ற வசதி தரப்பட்டுள்ளது இந்த தளத்தின் தனிச் சிறப்பு.  

UTI Technology Services Limited

.

ஃபோல்டரை உருவாக்கத் தெரியுமா?

என்ன இப்படி ஒரு கேள்வியை கேட்டு விட்டேன் என்று கோபப் படாதீர்கள் நண்பர்களே!.

உங்கள் கணினியில் ஏதாவது ஒரு ட்ரைவில் அல்லது டெஸ்க்டாப்பில் ஒரு  ஃபோல்டரை உருவாக்க வேண்டும். அதன் பெயர் CON என்று இருக்க வேண்டும். முடியுமா? 

விண்டோஸ் இயங்குதளத்தில் con, prn போன்ற பெயர்களில் ஃபோல்டர்களை உருவாக்க முடியாது, என்பது எங்களுக்கு தெரியாதா, என்று நீங்கள் என்னை முறைப்பது தெரிகிறது..   

கேள்வி அதுவல்ல. இந்த பெயரில் நான் உருவாக்கிய ஃபோல்டரின் ஸ்க்ரீன்ஷாட் ஐ பாருங்கள். இது போட்டோஷாப் வேலை அல்ல.

இது எப்படி உருவாக்கப் பட்டது என்று பின்னூட்டத்தில் சொல்லுங்கள்.

சரியான பதிலை யார் சொல்கிறார்கள் என்பதை மற்றொரு இடுகையில் பார்ப்போம்.

.

100 சிறந்த சுதந்திர இலவச மென்பொருட்கள் ஒரே தளத்தில்

100 சிறந்த சுதந்திர இலவச மென்பொருட்கள் ஒரே தளத்தில்... Ubuntu Linux Help

இதில் Linux க்கு மட்டுமின்றி பல மென்பொருட்கள் விண்டோஸ்  இயங்குதளத்திற்கும் சேர்த்து தரவிறக்க கிடைப்பது தனி சிறப்பு. 

தளத்திற்கான சுட்டி 

நண்பர்களே! .. உங்களுடைய பின்னூட்டங்களை Publish செய்யும் பொழுது ஏதோ சிறு பிரச்சனை எழுகிறது.. பார்த்துக் கொண்டிருக்கிறேன்.. பின்னூட்டங்கள் Publish ஆகவில்லை என்று தவறாக நினைக்க வேண்டாம்

.

ஆன்லைனில் பண பரிவர்த்தனை செய்பவர்களுக்கு

ஜிமெயில் கணக்கில் உங்களுக்கு Paypal மற்றும் eBay போன்ற பண பரிவர்த்தனை செய்ய உதவும் தளங்களிலிருந்து, வரும் மின்னஞ்சல்கள் உண்மையாகவே அந்த தளத்திலிருந்துதான் வருகிறது என்று எப்படி நம்ப முடியும்? 

இப்படி உங்களுக்கு வந்த மின்னஞ்சலில் உள்ள சுட்டிக்கு சென்று, உங்கள் கணக்கு விவரங்களை அளிக்கிறீர்கள். (அச்சு அசலில் Paypal / eBay தளத்தைப் போலவே இருக்கும்) அதில் நீங்கள் அளிக்கும் விவரங்களை களவாடிக்கொண்டு,  உங்களுக்கு பெரிய அளவில் ஒரு ஆப்பு வைத்தால்... கொஞ்சம் யோசித்துப் பாருங்கள்.    

மின்னஞ்சல் சேவையில் பல சிறப்பு வசதிகளை இலவசமாக வழங்கிவரும், கூகிள் (ஜிமெயில்) இதைப் பற்றி சிந்திக்காமல் இருக்குமா? 

உங்கள் ஜிமெயில் கணக்கில் நுழைந்து கொள்ளுங்கள். வலது மேற்புறமுள்ள Settings லிங்கை க்ளிக் செய்து, 

Labs பகுதிக்கு செல்லுங்கள். 

அங்கு Authentication icon for verified senders என்ற பகுதிக்கு செல்லுங்கள். 

இதை Enable செய்து விட்டால் போதும். இனி ஜிமெயில் Paypal மற்றும் eBay தளங்களைப் போன்ற பெயர்களை தாங்கிவரும் போலி மெயில்களை ஃபில்டர் செய்து விடும். 

 

 தற்சமயம் ஜிமெயில் இந்த வசதியை PayPal மற்றும் eBay கணக்குகளுக்கு மட்டுமே அளித்துள்ளது. 

ஆன்லைனில் பண பரிவர்த்தனை செய்யாதவர்களுக்கும் ஓட்டுரிமை உண்டு..

.

MS Project எளிதாக, இலவசமாக கற்றுக் கொள்ள

இந்த கணினி யுகத்தில் மைக்ரோசாப்ட் ப்ராஜெக்ட் என்ற பயன்பாடு, படித்து முடித்து, வேலை தேடுபவர்கள், தேடிப் பிடித்து  போய் படிக்கும் பயன்பாடுகளில் ஒன்று. 

இதனை இலவசமாக, எளிதாக (ஆங்கிலத்தில்) கற்றுத்தருகிறது ஒரு வலைப்பூ!   (சுட்டி இறுதியில் தரப்பட்டுள்ளது). 

Project Management என்பது குறித்தான எளிய விளக்கங்களுடன் துவங்குகிறது பாடம். 

" For example, when you start thinking about moving an office, you probably realize that it can be quite complex. There are many dependencies, such as if you committed to be out of the current space by a certain date, you have to make sure you can go somewhere, ideally to your new space. If the new space is not ready, you have to find another temporary place and/or storage. If you cannot find a mover or schedule phone and other installations, you may need to renegotiate the exit date. If the new space is not entirely ready, you need to carefully plan where and how people will operate. As you can see, there is a lot of complexity in even a simple move. This is a project. Managing it like a project and in the right way will improve your chances for success. Projects require a disciplined yet flexible approach."

ஒரு ப்ராஜெக்ட்டின் முக்கியத்துவத்தை படிப்படியாக விளக்கியபடி தொடருகிறது பாடம். புதிதாக டைம் லைன் ஐ உருவாக்குவது, Task ஒழுங்குபடுத்துவது,

• Track progress
  
• Critical Path Management
  
• CPM/PERT

போன்றவற்றை  தெளிவாக படங்களுடன் விவரித்து வருகிறது. 

இதற்காக தனியாக பயிற்சிக்கு சென்று படிக்கவேண்டிய அவசியமின்றி நாமே சுயமாக இத்தளத்தின் உதவியோடு கற்றுக் கொள்ள முடியும். 

தளத்திற்கு செல்ல 

.

Eraser

நாம் கணினியில் ஒரு கோப்பை அழிக்கிறோம், அதை Recycle bin லிருந்தும் நீக்கி விடுகிறோம்.  அந்த கோப்பு உண்மையில் உங்கள் கணினியிலிருந்து நீக்கப் பட்டு விட்டதா? 

இல்லை என்பதே பதில்! File system Table லில் இருந்து அந்த கோப்பின் reference மட்டுமே நீக்கப் பட்டுள்ளது. அந்த கோப்பு குறிப்பிட்ட ட்ரைவில் எழுதப்பட்டுள்ள இடத்தில் மறுபடியும் ஏதாவது கோப்பு விவரங்கள் மாற்றி மாற்றி எழுதப்பட்டால் மட்டுமே அந்த கோப்பு உண்மையிலேயே நீக்கப் பட்டுள்ளதாக கருதமுடியும். ஃபோர்மெட் செய்யும் பொழுதும் இதே கதைதான்.

உங்கள் பழைய கணினியை யாருக்காவது விற்கிறீர்கள் அல்லது கொடுக்கிறீர்கள், அல்லது உங்கள் மொபைல் போனை ரிப்பேருக்கு கொடுக்கிறீர்கள்,  (இந்த இடுகை சத்தியமாக சாமியார்களுக்கு எழுதப்பட்டதல்ல)  இப்படி கோப்புகள் அழித்ததாக நீங்கள் நினைத்திருக்கும் ட்ரைவிலிருந்து, ஒரு சில மென்பொருட்களைக் கொண்டு எளிதாக திரும்ப எடுத்து விட முடியும். 

அப்படியெனில் கணினியில் ஒரு ட்ரைவில் உள்ள தகவல்களை நிரந்தரமாக அழிப்பது எப்படி? ஒரு சிறந்த தீர்வாக அமைகிறது, Eraser எனும் சுதந்திர இலவச மென்பொருள். (தரவிறக்கச் சுட்டி இறுதியில் தரப்பட்டுள்ளது).

 

உங்கள் கணினியில் உள்ள ட்ரைவில் தகவல்களை நிரந்தரமாக அழிப்பதற்க்கான மென்பொருள் இது என்பதால், மிகவும் கவனமாக கையாளவும். 

Eraser தரவிறக்க 

Eraser வலைப்பக்க முகவரி

.

ஷார்ட்கட் ட்ரிக்ஸ்

வழக்கமாக நாம் விண்டோஸ் இயங்குதளத்தில் ஏதாவது ஒரு ஃபோல்டர் அல்லது கோப்பிற்கு ஷார்ட்கட் உருவாக்கும் பொழுது,

உருவாக்கப்படும் ஷார்ட்கட் இன் பெயர் Shortcut to + அந்த கோப்பின் பெயர் ஆக உருவாகுவதை கவனித்திருப்பீர்கள். உதாரணமாக Test என்ற ஃபோல்டரின் shortcut, Shortcut to Test என உருவாக்கப்படும். 

இது போல விண்டோஸ் 7 மற்றும் விஸ்டாவில் Test - shortcut என உருவாக்கப்படும். இப்படி Shortcut to அல்லது Shortcut என பெயரோடு சேர்க்கப் படுவதை தவிர்க்க என்ன செய்ய வேண்டும்? உதாரணமாக Test என்ற ஃபோல்டருக்கான  shortcut -இன் பெயரும் Test என்றே இருக்க வேண்டும். (அப்படின்னா இரண்டுக்கும் எப்படி வித்தியாசம் தெரியும் என கேட்பவர்களுக்கு - அதான் இடது புற ஓரத்தில் சின்ன அம்புக்குறி வருமே... )

விண்டோஸ் start மெனுவில் Run (விஸ்டா மற்றும் 7 -இல் search box ) சென்று Regedit என டைப் செய்து Registry editor ஐ திறந்துக் கொள்ளுங்கள். அங்கு கீழே தரப்பட்டுள்ள பகுதிக்கு செல்லுங்கள். 

 

HKEY_CURRENT_USER

Software

Microsoft

Windows

CurrentVersion

Explorer

இடது புற பேனில் Explorer ஐ க்ளிக் செய்த பிறகு, வலது புற பேனில், Link என்ற key ஐ இரட்டை க்ளிக் செய்து,   அங்கு அதன் மதிப்பு  1b 00 00 00 (Windows xp) 1e 00 00 00 (Windows 7 / Vista) என்று இருப்பதை முதல் இரண்டு இலக்கங்களையும் 00 என மாற்றி விடுங்கள். அதாவது 00 00 00 00.

இதற்கு மேல் ஒரு முறை Log off அல்லது Restart செய்த பிறகு நீங்கள் உருவாக்கும் ஷார்ட்கட் , அந்த கோப்பின் பெயரிலேயே இருக்கும்.

மறுபடியும் இதை மாற்ற இதே வழியை பின்பற்றி மேலே சொன்ன மதிப்பை பழையபடி மாற்றிக்கொள்ளுங்கள்.


.

மைக்ரோசாப்ட் ஆபீஸ் 2007 தொகுப்பிற்கான வேதியல் நீட்சி

எனது கடந்த இடுகையான "மைக்ரோசாப்ட் ஆபீஸ் 2007 தொகுப்பிற்கான கணித நீட்சி" ஐ வாசித்த வேதியல் துறையில் பணியிலிருக்கும் நண்பர் ஒருவர், 'கணிதத்திற்கு நீட்சி உள்ளது போல வேதியல் சமன்பாடுகள், வரைபடங்களை கையாள வேறு ஏதேனும் வழியுள்ளதா'   என்ற கேள்வி எழுப்பியிருந்தார். 

உள்ளது என்பதே, பதில்! 

வேதியல் சமன்பாடுகள் மற்றும் மூலக்கூறுகளின் வரைபடங்களை சிறந்த முறையில்  மைக்ரோசாப்ட் வேர்டு பயன்பாட்டில் உருவாக்க, வேதியல் பயிலும் மாணவர்கள், ஆசிரியர்கள், ஆராய்ச்சியாளர்களுக்கு மிகச் சிறந்த ஒரு தீர்வாக, Microsoft’s new Education Labs சமீபத்தில் வெளியிட்டுள்ள Chemistry Add-in for Word 2007 and 2010 (பீட்டா வடிவில்) அமைந்துள்ளது. (தரவிறக்கச் சுட்டி இறுதியில் தரப்பட்டுள்ளது)

இந்த நீட்சியை தரவிறக்கி நிறுவும்பொழுது, Visual Studio Tools for Office 3.0 ஐ நிறுவ வேண்டும் என்ற செய்தி வரும். இந்த வசனப்பெட்டியில் Yes கொடுத்து நிறுவிக்கொள்ளுங்கள். 

இதை நிறுவிய பிறகு, உங்கள் வேர்டு 2007 ரிப்பன் மெனுவில் புதிதாக Chemistry மெனு தோன்றியிருப்பதை காணலாம். 

      

இந்த நீட்சியை பயன்படுத்தி வேதியல் சமன்பாடுகள், வரைபடங்களை   எளிதாக உருவாக்க இயலும் 

மூலக்கூறு வடிவம். 

இதற்கு மேல் வேதியல் துறையில் எனக்கு அறிவு இல்லாத காரணத்தினால், மேற்கொண்டு விளக்கமாக இந்த இடுகையை தொடர இயலவில்லை.   துறையை சார்ந்தவர்கள் இந்த வசதியை உபயோகித்து பயன் பெறும்படி கேட்டுக்கொள்கிறேன். 

(வேதியல் துறையை சாராதவர்களும் ஓட்டுப் போடலாம்.)

  Download Chemistry Add-in for Word 2007

.